ՈԱԱԿ-ը, Հ. Հովնանյան ընտանեկան հիմնադրամի աջակցությամբ, մեկնարկում է «ՄԿՈՒ ոլորտում նորարարական ուսուցման կարողությունների զարգացում» ծրագիրը։
Ծրագիրը նպատակ ունի զարգացնել ՄԿՈՒ դասախոսների գործնական հետազոտական հմտություններն ու թվային կարողությունները, որպեսզի նրանք կարողանան ինքնուրույն վերանայել և արդիականացնել կրթական ծրագրերը և դասընթացի նկարագրերը՝ համապատասխանեցնելով դրանք աշխատաշուկայի պահանջներին և Որակավորումների ազգային շրջանակին։
Ի՞նչ գործիքներ ու կարողություններ կստանան դասախոսները
- Հետազոտական հմտություններ՝ կրթության մեջ վերլուծական մտածողության, հիմնավորված որոշումների և տվյալների վրա հիմնված ծրագրերի մշակման համար։
- Թվային հմտություններ՝ կրթական տեխնոլոգիաների և թվային գործիքների կիրառմամբ ուսուցման արդյունավետությունը բարձրացնելու համար։
- Կրթական ծրագրերի արդիականացում՝ ներդնելով հետազոտական նախագծեր, միջառարկայական մոտեցումներ և գործնական բաղադրիչներ։
Ինչու է կարևոր այս ծրագիրը հենց հիմա
Վերջին օրենսդրական փոփոխությունների համաձայն՝ ՄԿՈՒ հաստատություններին է վերապահված իրենց կրթական ծրագրերի մշակման, բարելավման ու արդիականացման ամբողջական գործընթացը։ Այսուհանդերձ, հավատարմագրման արդյունքները ցույց են տալիս, որ այս գործընթացն արդյունավետ կազմակերպելու համար անհրաժեշտ է զարգացնել դասախոսների հետազոտական և թվային կարողությունները։
Այս ծրագիրը հենց այդ բացը լրացնելու համար է՝ ձևավորելու ժամանակակից ուսուցման մշակույթ, որը հիմնված է հետազոտության, թվայնացման և աշխատաշուկայի պահանջներին արձագանքելու վրա։
Արդյունքում․
- Գյուղատնտեսական, բժշկական և ՏՏ ոլորտի ՄԿՈւ հաստատությունների 80 դասախոս կստանա գործնական վերապատրաստում,
- Կրթական ծրագրերը կվերանայվեն՝ դառնալով ավելի կիրառական և ժամանակակից` աշխատաշուկայի պահանջներին համապատասխան,
- Կձևավորվի շարունակական ինքնագնահատման և բարելավման մշակույթ։