Բարձրագույն կրթության հարափոփոխվող միջավայրում ուսանողակենտրոն մոտեցումների կիրառումը դարձել է դասավանդման և ուսումնառության որակի գնահատման առանցքային կատարողական ցուցանիշ։ Բայց ինչ է նշանակում ուսանողակենտրոն լինելը, և ինչու է այն այդքան կարևոր։ 
📌 Ի՞նչ է ուսանողակենտրոն մոտեցումը 
Ուսանողակենտրոն մոտեցման դեպքում ուսանողը կրթական փորձառության կենտրոնում է: Դա նշանակում է, որ դասավանդման մեթոդները, ուսումնական ծրագրերի կառուցվածքը և ինստիտուցիոնալ քաղաքականությունները մշակվում են՝ հաշվի առնելով ուսանողների բազմազան կարիքները, հետաքրքրություններն ու նրանց համապատասխան ուսումնառության ոճերը։ Ահա որոշ հիմնական տարրեր․ 

• Ակտիվ ուսումնառություն․ խթանում է ուսանողների մասնակցությունը ուսումնական գործընթացին՝ քննարկումների, նախագծերի և գործնական աշխատանքների միջոցով։ 
• Անհատականացված ուսուցում․ դասավանդման մեթոդների և նյութերի հարմարեցում՝ հաշվի առնելով ուսանողների  ուսուցման տարբեր տեմպերն ու ոճերը։ 
• Համագործակցային ուսուցում․ խրախուսում է խմբային աշխատանքն ու ուսանող-ուսանող փոխգործակցությունը՝ գիտելիքի ամրապնդման նպատակով։ 
• Աջակցող միջավայր․ ապահովում է շարունակական հետադարձ կապ, ուսումնական խորհրդատվություն, հոգեբանական աջակցություն և կարիերայի ուղղորդման ծառայություններ՝ ուսանողների հաջողությունը խթանելու համար։ 

🔎 Ինչու է դա կարևոր 
Հետազոտությունները ցույց են տվել, որ ուսանողակենտրոն մոտեցումները նպաստում են ավելի լավ կրթական արդյունքների ապահովմանը։ Ահա թե ինչու․ 

• Խորքային ներգրավվածություն․ ուսանողները դառնում են ավելի ակտիվ և մոտիվացված՝ մասնակցելով իրենց ուսումնառությանը։ 
• Կայունություն․ Անհատականացված և աջակցող ուսումնական միջավայրերը նպաստում են ուսանողների դուրս մնալու դեպքերի նվազմանը և նրանց կրթությունը հաջողությամբ շարունակելու հավանականության բարձրացմանը։  
• Բավարարվածության բարձր ցուցանիշներ․ երբ ուսանողները զգում են, որ իրենց կարիքները բավարարվում են, նրանց գոհունակության մակարդակը բարձրանում է։ 
• Ավելի արդյունավետ կրթական վերջնարդյունքներ․ ակտիվ և համագործակցային ուսուցման ռազմավարությունները նպաստում են գիտելիքի խորացմանն ու ամրապնդմանը։ 

📊 Ուսանողակենտրոն մոտեցումների չափումը 
Կրթական հաստատությունները կարող են կիրառել հետևյալ ԳԱՑ-երը՝ համոզվելու, որ  ուսանողակենտրոն մոտեցումները արդյունավետորեն իրականացվում են․ 

• Ուսանողների բավարարվածության հարցումներ․ ուսանողների կարծիքների հավաքագրում՝ դասավանդման մեթոդների և աջակցության ծառայությունների վերաբերյալ։ 
• Ընդունվելու և ավարտելու ցուցանիշներ․ Ուսանողների կողմից ուսումնառությունը շարունակելու և այն հաջողությամբ ավարտելու ցուցանիշների դիտարկում։ 
• Կրթական վերջնարդյունքներ․ գնահատում՝ ստանդարտացված թեստերի և գործնական հանձնարարւթյունների միջոցով։ 
• Ներգրավվածության չափանիշներ․ ակադեմիական և արտալսարանային գործունեության մեջ ուսանողների մասնակցության մակարդակի վերլուծություն։ 

🎯 Եզրակացություն 
Ուսանողակենտրոն մոտեցման որդեգրումը ոչ միայն բարելավում է ուսանողների փորձառությունը, այլև բարձրացնում է կրթական հաստատությունների ընդհանուր որակը և համբավը։ Ուսանողների կարիքներին և փորձառություններին հարմարեցված կրթությունը կարող է ձևավորել ավելի արդյունավետ, ներառական և աջակցող ուսումնառության միջավայր։ 

Աղբյուրը՝ «Դասավանդման և ուսուցման որակի ցուցանիշները բարձրագույն կրթությունում»,  Դենիզ Չալմերս