Այո, hարցաշարը լրացնելը պարտադիր է։

 Հավատարմագրմանը նախապատրաստվելիս այդ տվյալներն առանձնացված  ունենալը կնպաստի, որ ՄՈՒՀ-ի  ինքավերլուծությունն ունենա առավել վերլուծական բնույթ։  Այդ տվյալները կծառայեն նաև փորձագետներին թե՛ նախնական, թե՛ բուն արտաքին գնահատման ժամանակ։

Դա պետության կողմից մասնագիտական ուսումնական հաստատությունների գործունեության, մասնագիտությունների կրթական ծրագրերի իրականացման և որակի ճանաչման գործընթաց է: Հավատարմագրումը տրվում է որոշակի ժամանակահատվածով` երաշխավորելով, որ ուսումնական հաստատությունը կամ կրթական ծրագիրն ունի անհրաժեշտ կարողություն տվյալ ժամանակահատվածում կրթական գործունեություն իրականացնելու համար: Մասնագիտական կրթության հավատարմագրման հիմնական նպատակն է հավաստել ՄՈՒՀ-երին, ուսանողներին, նրանց ծնողներին, գործատուներին և շահագրգիռ հասարակությանը, որ մասնագիտական կրթության որակը ճանաչելի է  պետության կողմից: ՄՈՒՀ-երում որակի հավաստումն իրականացվում է ինստիտուցիոնալ և ծրագրային հավատարմագրման միջոցով:

Ծրագրային հավատարմագրումը պետության կողմից մասնագիտության կրթական ծրագրի, մասնագետների պատրաստման որակի` պետական կրթական չափորոշիչներին և ծրագրային հավատարմագրման չափանիշներին համապատասխանության ճանաչումն է: Ծրագրային հավատարմագրման թիրախն առանձին մասնագիտության կրթական ծրագիրն է, ոչ թե հաստատությունն ամբողջությամբ: Այս գործընթացը թույլ է տալիս պարբերաբար գնահատել մասնագիտության կրթական ծրագրի արդյունավետությունը, ինչպես նաև վերահսկել` արդյոք այն ապահովում է ուսումնառության արդյունքների ձեռքբերումը ակնկալվող ամբողջ ծավալով:

Ենթակառուցվածքային (ինստիտուցիոնալ) հավատարմագրումը պետության կողմից ուսումնական հաստատության կրթական և  որակի ապահովման գործընթացների, մասնագիտությունների կրթական ծրագրերի պետական կրթական չափորոշիչներին և ենթակառուցվածքային հավատարմագրման չափանիշներին համապատասխանության ճանաչումն է: Այն  պարբերաբար իրականացվող պարտադիր գործընթաց է մասնագիտական ուսումնական բոլոր հաստատությունների համար:  Այս գործընթացը թույլ է տալիս պարբերաբար գնահատել ՄՈՒՀ-ի գործունեության արդյունավետությունը, ինչպես նաև վերահսկել` արդյոք այն իրականացնում է իր առաքելությունը: Ինստիտուցիոնալ հավատարմագրումը նախապայման է ծրագրային հավատարմագրման համար:

Համաձայն ՈԱԱԿ-ի մոտեցման՝ որակը  համապատասխանությունն է սահմանված նպատակներին:  

Այսպես, հաստատություններն իրենց որդեգրած առաքելության շրջանակում կարող են ներառել  նպատակներ, որոնց իրականացման աստիճանով է գնահատվելու որակը:

Յուրաքանչյուր ուսումնական հաստատություն պատասխանատու է  իր կրթության որակի համար, այսինքն՝  ինքն է ներդնում որակի ապահովման ներբուհական համակարգ և իրականացնում  որակի ներքին ապահովման գործընթացներ:

Այլ կերպ ասած՝ ուսումնական հաստատությունը սահմանում է իր գործունեության շրջանակը, իրականացնում է այն և հիմնավորում է դա երրորդ մարմնին՝ ՈԱԱԿ-ին:

Հավատարմագրման նպատակն է որոշել, թե որքանով են կրթական ծառայությունները կամ կրթության արդյունքները համապատասխանում սահմանված նպատակներին և որքանով են դրանք համարժեք հասարակության պահանջներին, ՀՀ կառավարության կողմից  հաստատված չափանիշներին և գերակա ուղղություններին:

Հավատարմագրման հանձնաժողովը երեք հնարավոր որոշում կարող է կայացնել` հավատարմագրել (6  կամ 4 տարի ժամկետով), պայմանական հավատարմագրել (2  տարի ժամկետով) և չհավատարմագրել:

Ցանկացած որոշման դեպքում  ՄՈՒՀ-ը  ստանում է խորհրդատվություն: Պայմանական հավատարմագրումը նշանակում է, որ լուրջ  խնդիրներ կան և նշված ժամանակահատվածում դրանք պետք է վերացվեն:

Եթե ՄՈՒՀ-ում  կրթության որակը թույլատրելիի շեմից բարձր է, այս դեպքում ՄՈՒՀ-ը հավատարմագրվում է և հնարավորություն է ստանում խորհրդատվությունների միջոցով էլ ավելի որակյալ գործունեություն ծավալել:

Իսկ հավատարմագրման գործընթացը ձախողած ՄՈՒՀ-ին  ժամանակ է հատկացվում առկա խնդիրները շտկելու և նորից դիմելու հավատարմագրման համար:

Պայմանական հավատարմագրված ՄՈՒՀ-երը  6 ամիսը մեկ պետք է հաշվետվություն ներկայացնեն ՈԱԱԿ-ին  մատնանշված խնդիրների լուծման ուղղությամբ ձեռնարկված քայլերի մասին։

Իսկ  4 կամ 6 տարով հավատարմագրվելու դեպքում, Հավատարմագրման կարգի համաձայն, ՄՈՒՀ-ը  երկու տարին մեկ ինստիտուցիոնալ ներքին գնահատում   պետք է իրականացնի և  արդյունքները ներկայացնի ՈԱԱԿ: