Ըստ «Հավատարմագրման հանձնաժողովի ձևավորման և գործունեության կարգի»`հանձնաժողովի անդամների թեկնածությունները առաջադրում են մասնագիտական ուսումնական հաստատությունները, գործատուների և այլ մասնագիտական  միությունները:  Առաջադրված թեկնածուներից ընտրում և հանձնաժողովի վերջնական կազմը ձևավորում է ՈԱԱԿ հոգաբարձուների խորհուրդը: Հանձնաժողովի անդամներ կարող են լինել  կրթության, գիտության, մշակույթի, տնտեսության տարբեր ոլորտների և  պետական կառավարման փորձառու մասնագետներ, գործատուներ: Հանձնաժողովը բաղկացած է տասն անդամներից: Հանձնաժողովի կազմի լիազորությունների ժամկետը 3  տարի է:

Պայմանական հավատարմագրված բուհերը 6 ամիսը մեկ պետք է հաշվետվություն ներկայացնեն ՈԱԱԿ-ին  մատնանշված խնդիրների լուծման ուղղությամբ ձեռնարկված քայլերի մասին Իսկ  հավատարմագրվելու դեպքում, Հավատարմագրման կարգի համաձայն, բուհը երկու տարին մեկ ինստիտուցիոնալ ներքին գնահատում   պետք է իրականացնի և  արդյունքները ներկայացնի ՈԱԱԿ-ին:

Հավատարմագրման հանձնաժողովը երեք հնարավոր որոշում կարող է կայացնել` հավատարմագրել (6  կամ 4 տարի ժամկետով), պայմանական հավատարմագրել (2  տարի ժամկետով) և չհավատարմագրել:
Ցանկացած որոշման դեպքում  բուհը ստանում է խորհրդատվություն: Պայմանական հավատարմագրումը նշանակում է, որ լուրջ  խնդիրներ կան և նշված ժամանակահատվածում դրանք պետք է վերացվեն:
Եթե բուհում կրթության որակը թույլատրելիի շեմից բարձր է, այս դեպքում բուհը հավատարմագրվում է և հնարավորություն է ստանում խորհրդատվությունների միջոցով էլ ավելի որակյալ գործունեություն ծավալել:
Իսկ հավատարմագրման գործընթացը ձախողած բուհին ժամանակ է հատկացվում առկա խնդիրները շտկելու և նորից դիմելու հավատարմագրման համար:

Հավատարմագրման նպատակն է որոշել, թե որքանով են կրթական ծառայությունները կամ կրթության արդյունքները համապատասխանում սահմանված նպատակներին և որքանով են դրանք համարժեք հասարակության պահանջներին, ՀՀ կառավարության կողմից  հաստատված չափանիշներին և գերակա ուղղություններին

Համաձայն ՈԱԱԿ-ի մոտեցման՝ որակը  համապատասխանությունն է սահմանված նպատակներին:  Այսպես, հաստատություններն իրենց որդեգրած առաքելության շրջանակում կարող են ներառել  նպատակներ, որոնց իրականացման աստիճանով է գնահատվելու որակը: Յուրաքանչյուր ուսումնական հաստատություն պատասխանատու է  իր կրթության որակի համար, այսինքն՝  ինքն է ներդնում որակի ապահովման ներբուհական համակարգ և իրականացնում  որակի ներքին ապահովման գործընթացներ: Այլ կերպ ասած՝ ուսումնական հաստատությունը սահմանում է իր գործունեության շրջանակը, իրականացնում է այն և հիմնավորում է դա երրորդ մարմնին՝ ՈԱԱԿ-ին:

Ենթակառուցվածքային (ինստիտուցիոնալ) հավատարմագրումը պետության կողմից ուսումնական հաստատության կրթական և  որակի ապահովման գործընթացների, մասնագիտությունների կրթական ծրագրերի պետական կրթական չափորոշիչներին և ենթակառուցվածքային հավատարմագրման չափանիշներին համապատասխանության ճանաչումն է: Այն  պարբերաբար իրականացվող պարտադիր գործընթաց է մասնագիտական ուսումնական բոլոր հաստատությունների համար:  Այս գործընթացը թույլ է տալիս պարբերաբար գնահատել ՄՈՒՀ-ի գործունեության արդյունավետությունը, ինչպես նաև վերահսկել` արդյոք այն իրականացնում է իր առաքելությունը: Ինստիտուցիոնալ հավատարմագրումը նախապայման է ծրագրային հավատարմագրման համար:

Ծրագրային հավատարմագրումը պետության կողմից մասնագիտության կրթական ծրագրի, մասնագետների պատրաստման որակի` պետական կրթական չափորոշիչներին և ծրագրային հավատարմագրման չափանիշներին համապատասխանության ճանաչումն է: Ծրագրային հավատարմագրման թիրախն առանձին մասնագիտության կրթական ծրագիրն է, ոչ թե հաստատությունն ամբողջությամբ: Այս գործընթացը թույլ է տալիս պարբերաբար գնահատել մասնագիտության կրթական ծրագրի արդյունավետությունը, ինչպես նաև վերահսկել` արդյոք այն ապահովում է ուսումնառության արդյունքների ձեռքբերումը ակնկալվող ամբողջ ծավալով:

Դա պետության կողմից մասնագիտական ուսումնական հաստատությունների գործունեության, մասնագիտությունների կրթական ծրագրերի իրականացման և որակի ճանաչման գործընթաց է: Հավատարմագրումը տրվում է որոշակի ժամանակահատվածով` երաշխավորելով, որ ուսումնական հաստատությունը կամ կրթական ծրագիրն ունի անհրաժեշտ կարողություն տվյալ ժամանակահատվածում կրթական գործունեություն իրականացնելու համար: Մասնագիտական կրթության հավատարմագրման հիմնական նպատակն է հավաստել ՄՈՒՀ-երին, ուսանողներին, նրանց ծնողներին, գործատուներին և շահագրգիռ հասարակությանը, որ մասնագիտական կրթության որակը ճանաչելի է  պետության կողմից: ՄՈՒՀ-երում որակի հավաստումն իրականացվում է ինստիտուցիոնալ և ծրագրային հավատարմագրման միջոցով: